У івацэвіцкай калоніі памёр зняволены — праваабаронцы
Калонія ў Івацэвічах / МУС Беларусі
У івацэвіцкай папраўчай калоніі №22 "Ваўчыныя норы" памёр зняволены. Яму было каля 50 гадоў, у яго на волі засталася сям'я.
Прычыну смерці вязня высветліць пакуль не ўдалося, адзначаюць праваабаронцы з MAYDAY. Але два тыдні таму з гэтай калоніі прыходзілі весткі пра верагодную эпідэміюі кавіду. Асуджаныя хварэлі цэлымі атрадамі, а лячылі іх толькі парацэтамолам.
Пра тое, што сімптомы хваробы ў калоніі вельмі нагадваюць каранавірус, пераказалі на волю самі зняволеныя. Таксама яны паведамлялі, што падчас замаразкаў у бараках калоніі пануе холад. Адміністрацыя калоніі зняпраўджвала звесткі пра рост захворвання. Калі ж навіна з'явілася ў недзяржаўных СМІ, адміністрацыя стала пагражаць адказнасцю за перадачу звестак "экстрэмісцкім" рэсурсам.
