У Баранавічах беспрацоўны скраў машыну і паехаў шукаць вакансіі ў сталіцу
Рашэнне было спантанным — ідэя ўзяць чужое аўто прыйшла на нецвярозую галаву.
Жыхар Баранавіцкага раёна, які не мог знайсці працу на малой радзіме, скраў аўтамабіль і паехаў на пошукі заробка ў Мінск. Гэтае кур’ёзнае крымінальнае здарэнне адбылося 11 ліпеня. Маці ўладальніка аўтамабіля “Форд Эскорт” напісала заяву ў міліцыю, што іх машыну скралі са двара дома.
На наступны дзень аўтамабіль знайшлі ў Мінску супрацоўнікі ДАІ Заводскага раёна. За рулём быў 30-гадовы жыхар гарадскога пасёлка Гарадзішча Баранавіцкага раёна.
Затрыманы сказаў, што быў п’яны, убачыў машыну і спантанна вырашыў, што яму трэба ехаць у Мінск і шукаць там працу.
Дзеянні мужчыны кваліфікавалі як крадзеж, паведамляе Intex-press.
