У жыхароў Асіповічаў з'явілася вада

У Асіповічах у Магілёўскай вобласці аднавілі водазабеспячэнне. Горад быў без вады з ночы (пра аварыю стала вядома ў 01:50). На працягу дня будзе праводзіцца яе хлараванне і кантроль якасці (бо з кранаў цякла вада "неналежнага выгляду").

У Асіповічах каля 29 тысяч жыхароў. Прарыў на вадаправодзе стаў прычынай знікнення вады ва ўсім горадзе. На месцы працавалі супрацоўнікі водаканала з Асіповічаў і Бабруйска, а таксама ратавальнікі і іх спецтэхніка. "Для лакалізацыі аварыі было адключана водазабеспячэнне з паўночнага і паўднёвага водазабораў горада", — тлумачыў раніцай у відэазвароце старшыня Асіповіцкага райвыканкама Андрэй Дубінчык. Пазней, калі месца аварыі "лакалізавалі", водазаборы пачалі па чарзе ўключаць.

Тым часам па горадзе размясцілі цыстэрны з пітной вадой. А прапагандысты пачалі запісваць відэаролікі з мясцовымі жыхарамі пра тое, як "усе службы зрэагавалі хутка", а яны "праблем з адсутнасцю вады не адчулі". 

Адзначаецца, што ў Асіповічах "цеплазабеспячэнне парушана не было".