Трое маленькіх дзяцей загінулі ад расійскага дрона ў Харкаўскай вобласці

У ноч на 11 лютага расійскі дрон пацэліў у прыватны дом у горадзе Багадухаве Харкаўскай вобласці.

У доме пачаўся пажар. Спачатку паведамлялі, што ратавальнікі шукалі пад заваламі 34-гадовага мужчыну і траіх дзяцей — двухгадовую дзяўчынку і двух аднагадовых хлопчыкаў. Пазней стала вядома, што ўсе чацвёра загінулі ад удару і траўмаў, перадае hromadske.ua.

Пацярпелі 35-гадовая цяжарная жанчына і 74-гадовая жанчына.

Таксама расійскія войскі атакавалі Запарожжа і Запарожскую вобласць. У Запарожжы, як паведаміў кіраўнік абласной ваеннай адміністрацыі Іван Фёдараў, пацэлілі па аб'екце інфраструктуры. У выніку без электрычнасці засталіся больш за 11 тысяч абанентаў у двух раёнах горада.

"Аднаўленне цяпла можа быць вельмі складаным і доўгім, асабліва ў адным з раёнаў горада", — адзначыў Фёдараў. Ён дадаў, што ў Камунарскім раёне Запарожжа ставяць дадатковыя "пункты нязломнасці".