Расійскія банкі купляюць пяцізначныя вулічныя табло курсаў валют

Некаторыя расійскія банкі пачалі купляць для абменнікаў пяцізначныя табло валют (яны ўтрымліваюць тры сімвалы да коскі і два пасля яе). Банкам давядзецца масава мяняць 4-значныя табло, калі курсы долара і еўра дасягнуць адзнакі ў 100 рублёў і перавысяць яе. Аднак змяніць табло хутка пры такім песімістычным сцэнары атрымаецца далёка не ва ўсіх, у тым ліку і таму, што лічбавыя шыльды таксама даражэюць. Таму, як піша газета "Известия", да новай сітуацыі будуць прыстасоўваць і старыя табло, перасоўваючы коску.

Паводле курса Цэнтрабанка Расіі на аўторак, 16 снежня, долар каштуе 58,35 рубля (з пачатку года вырас на 50%), еўра — 72,66 (вырас на 40%). Увечары ў панядзелак курс долара ўзрастаў да 62,3 рублі, а курс еўра — да 77,5. Пасля адбыўся адскок, які звязваюць з умяшаннем Банка Расіі, інфармуе ВВС.

З-за інфляцыі Цэнтрабанк павысіў ключавую стаўку з 10,5 да 17% гадавых. Такім чынам, робяцца спробы "абмежаваць дэвальвацыйныя і інфляцыйныя рызыкі, якія ўзраслі апошнім часам".

Фота — izvestia.ru