Прыезд пакістанцаў можа запаволіць рост заробкаў у Беларусі — эканамістка

13/05/2025 - 13:47

Прыезд пакістанцаў можа запаволіць рост заробкаў у Беларусі / Reuters

Лукашэнка запрасіў у Беларусь 150 тысяч працоўных мігрантаў з Пакістана, каб вырашыць праблему з працоўнымі месцамі на дзяржпрадпрыемствах.

Што гэта значыць для эканомікі? Ці спыніцца рост заробкаў пасля іх прыезду? Еўрарадыё спытала эканамістку.

Наўрад ці столькі пакістанцаў наогул прыедзе

Старшая навуковая супрацоўніца аналітычнага цэнтра Beroc Анастасія Лузгіна кажа, што прыцягненне мігрантаў — гэта толькі адна з мер, якая можа часткова развязаць праблему на рынку працы Беларусі.

— Беларусь не з'яўляецца краінай, вельмі прывабнай для працоўных мігрантаў. Таму чакаць, што цяпер прыедуць 150 або 200 тысяч замежных работнікаў, гатовых заняць працоўныя пазіцыі, якія цяпер вакантныя — гэта наўрад ці.

Па-першае, грамадзяне іншых дзяржаў павінны пагадзіцца прыехаць у Беларусь, а па-другое, яны павінны працаваць у беларускай эканоміцы з улікам магчымага канфлікту ў моўным плане. Калі мы гаворым пра Пакістан, наўрад ці там нехта ведае рускую мову.

Приезд пакистанцев может замедлить рост зарплат в Беларуси — экономистка

Ці ёсць плюсы ад прыезду пакістанцаў? / telegraf.news

Што тычыцца пытанняў заработнай платы, кажа Анастасія Лузгіна, то яе рост, які цяпер адбываецца ў Беларусі, — гэта не заўсёды добры трэнд.

— Калі прадпрыемствы павышаюць заробкі на шкоду сабе, то рана ці позна яны самі сутыкаюцца з фінансавымі цяжкасцямі, што можа прывесці нават да банкруцтва. Гэта значыць зарплата можа павышацца, безумоўна, але пры гэтым павінна расці прадукцыйнасць працы.

На думку эксперткі, калі дапусціць, што нейкая колькасць мігрантаў пагодзіцца прыехаць і заняць вакантныя пазіцыі, то гэта можа знізіць напружанасць на рынку працы.

— Не абавязкова зарплаты перастануць расці, яны могуць працягнуць павышацца. Але зноў-такі тут пытанне эфектыўнасці. Бескантрольны рост заробкаў або стымуляванне росту прыводзіць у сукупнасці з іншымі фактарамі да перагрэву эканомікі, разгону інфляцыі і зніжэння ў рэальным выражэнні даходаў насельніцтва.

Станоўчыя і адмоўныя бакі

Калі абстрагавацца ад сітуацыі ў Беларусі, прыцягненне працоўнай міграцыі можа мець як станоўчыя, так і адмоўныя бакі, лічыць Анастасія Лузгіна.

— Сярод станоўчых бакоў гэта і зніжэнне дэфіцыту працоўнай сілы, зніжэнне выдаткаў на адукацыю, паколькі калі ўжо гатовыя работнікі прыязджаюць, то менш трэба марнаваць на падрыхтоўку спецыялістаў. Ну і, вядома, гэта страхуе кампаніі ад неабгрунтаванага росту зарплаты, гэта значыць, зніжае напружанасць у выніку.

З-за прыезду замежнікаў рост заробкаў можа знізіцца / Myfin.by

Што датычыць недахопаў, то гэта рост беспрацоўя, калі ў краіне такая праблема ёсць. Зрэшты, у Беларусі такой праблемы зараз няма.

— Вядома, можа назірацца і зніжэнне росту заробкаў за кошт празмернай колькасці людзей, якія прыязджаюць, і вялікай канкурэнцыі з боку попыту. Але пакуль Беларусі гэта дакладна не пагражае.

І наогул, для таго каб эканоміка развівалася, каб узровень жыцця павышаўся, заробкі раслі, патрэбны рэсурсы. А рэсурс гэты — чалавечая праца. І вось у Беларусі ён цяпер у дэфіцыце.