Першая навальніца прагрымела ў Віцебску 4 сакавіка

Першая сёлета навальніца прагрымела ў Віцебску 4 сакавіка. Яна здарылася каля 23-й гадзіны і суправаджалася залевай, грымотамі, маланкамі і градам дыяметрам 6 мм.

Такую ж карціну зафіксавалі і на метэаралагічнай станцыі Езярышча ў Гарадоцкім раёне, піша sb.by.

Сіноптыкі тлуцмачаць навальніцу анаміальна цёплым надвор'ем на Віцебшчыне, бо звычайна навальніцы характэрныя для летняй пары. Цяпер жа сярэднясутачная тэмпература перавышае норму на 6 градусаў, кажа начальніца аддзела "Віцебскаблгідрамета" Наталля Байдук.

"Прычына сакавіцкай навальніцы — у высокай няўстойлівасці ў атмасферы, звязанай з праходжаннем халоднага атмасфернага фронту, які прыйшоў на тэрыторыю нашай краіны з Прыбалтыкі", — дадае спецыяліст.

Дарэчы, з 1936 года сакавіцкія навальніцы ў Беларусі фіксавалі толькі дзесяць разоў. Прычым за гэтыя ж 89 гадоў было зафіксавана 55 выпадкаў навальніцы ў красавіку, а ў траўні — 295. Абсалютным рэкардсменам па навальніцах метэаролагі называць ліпень — 568 навальніц.