Перад акцыяй пратэсту ў Мінск з'язджаецца спецтэхніка і пачаліся затрыманні
Сілавікі рыхтуюцца да традыцыйнага нядзельнага маршу / telegram
Сёння — 36-ы дзень пратэстаў у Беларусі. У Мінску па традыцыі чакаецца нядзельны маштабны марш, а сілавікі з самай раніцы пачалі да яго рыхтавацца. На вуліцах сталіцы — зноў калючы дрот, сілавікі і спецтэхніка. Ужо паведамляецца пра затрыманні.
Аўтазакі, бусы без нумароў і сілавікі занялі звыклыя месцы на праспекце Незалежнасці каля ГУМа. Перакрытыя некаторыя бліжэйшыя вуліцы. На Кастрычніцкай плошчы разгарнулі калючы дрот. Побач са стэлай — загароды. Таксама сілавікі перакрылі падыходы да плошчы Незалежнасці.
Спецтэхніку сцягваюць да Палаца Незалежнасці — менавіта туды ў апошнія нядзельныя пратэсты накіроўваліся шматтысячныя калоны мітынгоўцаў.
Мінчане ўжо паведамляюць пра затрыманні людзей з нацсімволікай. Сілавікі на сінім бусе без нумароў затрымалі некалькіх чалавек на вуліцы Маякоўскага.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
