Новы кіраўнік федэрацыі футбола Беларусі “чысціць” кадры, звязаныя з грашыма

Новы кіраўнік федэрацыі футбола Беларусі Яўген Булойчык, стаўленік міністра спорту, пачаў сваю дзейнасць са змены кадраў, якія звязаны з фінансамі арганізацыі. Пра гэта піша “Трыбуна”.

Паводле інфармацыі выдання, у жніўні на працягу некалькіх тыдняў былі звольненыя галоўная бухгалтарка федэрацыі (цяпер пасада застаецца вакантнай) і намеснік генеральнага сакратара АБФФ па фінансавых пытаннях. На гэтую пасаду прыйшла Наталля Шылько, якую прывёў сам Булойчык.

Як піша “Трыбуна”, са сваёй пасады можа быць зняты кіраўнік Тэхнічнага дэпартамента АБФФ Дзмітрый Касянок, які займае гэты пост з восені 2018 года. Міністр спорту хацеў прыбраць яго яшчэ пры папярэднім кіраўніку федэрацыі Мікалаі Шарснёве, але зрабіць гэтага не атрымалася.

Што такое Тэхнічны дэпартамент і пры чым тут грошы УЕФА

Тэхнічны дэпартамент федэрацыі футбола займаецца, у тым ліку, інфраструктурнымі аб’ектамі, на якія выдзяляе грошы УЕФА. Так, федэрацыя актыўна карыстаецца праграмай HatTrick, пабудаваўшы на гэтыя сродкі тэхнічны цэнтр у Мінску, абсталяваны палямі, гасцінічнымі карпусамі, медыцынскімі і вучэбнымі памяшканнямі.

У рамках праграм HatTrick і UEFA GROW праводзяцца курсы падрыхтоўкі трэнераў, адукацыйныя праекты і развіццё інфраструктуры супрацоўніцтва паміж клубамі, школамі і мясцовымі ўладамі.

Нагадаем, штогод федэрацыя футбола атрымлівае ад УЕФА каля 10 мільёнаў еўра.

Хто яшчэ быў звольнены ў федэрацыі футбола

27 жніўня кантракт “па пагадненні бакоў” быў скасаваны з генеральным сакратаром Сяргеем Жардзецкім, які працаваў у АБФФ з 2019 года. Суразмоўцы “Трыбуны” адзначаюць, што гэта даволі спецыфічная пасада, дзе трэба разбірацца ў эканамічных пытаннях, валодаць англійскай мовай і ўмець весці перамовы з еўрапейскімі футбольнымі чыноўнікамі.