Нігерыйскую студэнтку дэпартуюць з Беларусі для прафілактыкі
Пасяджэнне па высылцы нігерыйскай студэнткі / УУС Віцебскага аблвыканкама
Нігерыйскую студэнтку аднаго з віцебскіх універсітэтаў вырашылі дэпартаваць з Беларусі для прафілактыкі, паведамляе УУС Віцебскага аблвыканкама.
Дзяўчына навучаецца ў ВНУ з 2021 года. Яна фігуравала ў крымінальнай справе, звязанай з распаўсюдам наркотыкаў. Выявілася, што яна "працаўладкавалася" ў інтэрнэт-краму па распаўсюдзе наркотыкаў на пасаду закладчыцы. Зрэшты, наркотыкі для рэалізацыі яна не атрымала і да непасрэднай працы не прыступіла.
Тым не менш вырашылі выслаць з Беларусі "з мэтай прафілактыкі здзяйснення названай грамадзянкай злачынстваў і адміністрацыйных правапарушэнняў". Рашэнне было аформленае на пасяджэнні ў актавай зале Першамайскага рУУС Віцебска, куды запрасілі і іншых замежных студэнтаў.
Высланай замежніцы на пяць гадоў забаранілі ўезд у Беларусь.
