Для мінскіх школьнікаў адкрылі "Бяспечную прастору" — з турмой
Выстава "Бяспечная прастора" / Мінск-Навіны
Для школьнікаў адкрылі выставу з імітацыяй турмы. Выстава з назвай "Бяспечная прастора" дзейнічае ў Мінскім дзяржаўным палацы дзяцей і моладзі.
Асноўнай мэтай выставы начальнік упраўлення па наркакантролі і супрацьдзеянні гандлю людзьмі ГУУС Мінгарвыканкама Кірыл Бяркозаў назвае навучанне дзяцей бяспечным паводзінам у сетцы. Выстава павінна зберагчы іх ад удзелу ў кіберзлачынствах, незаконным абарачэнні наркотыкаў і злачынствах супраць палавой свабоды непаўналетніх, пішуць "Мінск-Навіны".
У імітаванай турэмнай камеры школьнікам прапануюць пазнаёміцца з гісторыяй асуджаных падлеткаў. Гэта 17-гадовыя дзяўчына і хлопец, асуджаныя на працяглыя тэрміны за збыт наркотыкаў.
"У фармаце "жывога эфіру" яны апавядаюць, як былі ўцягнутыя ў злачынную дзейнасць, страцілі свабоду і ўжо ў месцах пазбаўлення волі пераасэнсавалі сваё жыццё", — тлумачыць Бяркозаў.
