Ва Украіне просяць абмяняць затрыманую шпіёнку на журналіста Дзяніса Івашына
Дзяніс Івашын падчас суда
Украінскія журналісты просяць абмяняць Іну Кардаш, затрыманую ў Кіеве па падазрэнні ў працы на КДБ Беларусі, на супрацоўніка беларускай рэдакцыі InformNapalm Дзяніса Івашына.
Журналіст асуджаны на 13 гадоў зняволення за публікацыі пра былых украінскіх спецназаўцаў з атрада "Беркут", якія знайшлі працу ў беларускай міліцыі. Праваабаронцы прызналі яго палітвязнем.
Івашын знаходзіцца за кратамі з 12 сакавіка 2021 года. Ён не агент спецслужбаў, а OSINT-расследавальнік. Аднак гэта не перашкодзіла беларускім уладам абвінаваціць яго ў супрацы з украінскай разведкай.
Іна Кардаш была затрыманая за шпіянаж на карысць Беларусі. У СБУ сцвярджаюць, што КДБ завербаваў яе яшчэ ў 2015 годзе. Ведамства апублікавала запісы яе размоваў з куратарам: з іх вынікае, што ў 2020-м жанчыну перакінулі ва Украіну, дзе яна ўладкавалася журналісткай.
Пад гэтым прыкрыццём Кардаш збірала інфармацыю аб прадстаўніках беларускай дыяспары, а пазней — пра ўкраінскія вайсковыя падраздзяленні. Таксама яна спрабавала вербаваць украінскіх вайскоўцаў для працы на беларускую спецслужбу.
