Невядомыя шукаюць фатографа, каб здымаць сустрэчу з Ціханоўскім у Варшаве
Сяргей і Святлана Ціханоўскія / Офіс Святланы Ціханоўскай
Невядомыя спрабуюць праз месенджары наняць фатографа, каб паздымаць сустрэчу з Сяргеем Ціханоўскім у Варшаве.
Яны называюцца супрацоўнікамі расійскага медыя Port, але рэдакцыя не мае да іх ніякага дачынення. Таксама выданне паведаміла, што не шукае фатографаў і аператараў.
Імаверна, пад нікамі "Марія Габдиулина" і "Татьяна Лебедева" хаваюцца прадстаўнікі беларускіх спецслужбаў. За "працу" яны прапаноўвалі 500 злотых ці 100 еўра. Гатовыя былі заплаціць крыптой.
У сваіх паведамленнях адна з "дзяўчын" некалькі разоў пісала пра сабе ў мужчынскім родзе.
"Таццяна Лебедзева" ўвогуле пісала, што здымкі патрэбныя для "гуманітарнай установы "БАЗА".
Сустрэча са Святланай і Сяргеем Ціханоўскімі пачнецца 26 чэрвеня а 19-й каля помніка Мікалаю Каперніку. Ужо некалькі гадоў гэта традыцыйнае месца збору беларусаў Варшавы.
