АПК запускае інфацэнтры для вырашэння праблемаў беларусаў за мяжой

Для вырашэння праблемаў беларусаў за мяжой плануецца стварыць інфацэнтры. Гэтым займаецца Прадстаўніцтва па сацыяльнай палітыцы Аб'яднанага пераходнага кабінета (АПК).

Запуск такіх інфацэнтраў у розных краінах стане новым прыярытэтам Прадстаўніцтва па сацыяльнай палітыцы АПК у 2026 годзе, заявіла намесніца прадстаўніцы па сацыяльнай палітыцы Ірына Маклейн.

"Беларусы ў розных краінах сутыкаюцца з падобнымі сацыяльнымі праблемамі. Падтрымка у іх вырашэнні на сёння ёсць, але яна фрагментарная і неструктураваная. Інфацэнтры павінныя стаць часткай сістэмнага падыходу", — паведаміла Ірына МакЛейн.

Гэтыя інфацэнтры не будуць новай палітычнай арганізацыяй — яны стануць сэрвіснай функцыяй унутры ўжо наяўных дыяспаральных супольнасцяў і ініцыятыў. Плануецца, што ў інфацэнтры беларусам дапамогуць у развязанні канкрэтных праблем: дадуць кансультацыю (напрыклад, па легалізацыі, працы), інфармацыю пра сацыяльныя правы, накіраванне да юрыста, акажуць дапамогу ў пошуку меддапамогі, сувязі з крызіснымі службамі.