Нацбанк называе інфармацыю пра запланаваную дэвальвацыю фантазіямі
Нагадаем, днямі ў інтэрнэце з'явіліся публікацыі, у якіх сцвярджалася: увосень у Беларусі адбудзецца дэвальвацыя.
Нібыта, пра гэта паведаміла "крыніца ў Нацбанку".
"Як можна каментаваць такія паведамленні? — цытуе Радыё Свабода словы прэс-сакратара Нацбанка Аляксандра Цімашэнкі. — Вы насамрэч верыце, што інтэрнет-рэсурс, які распаўсюдзіў гэтую інфармацыю, мае надзейныя крыніцы ў Нацбанку?! Я не згадаю ніводнага выпадку, каб яны паведамілі надзейную інфармацыю з Нацбанка. Такая інфармацыя не заслугоўвае нават каментароў. Каментароў заслугоўвае інфармацыя, якая паходзіць з больш-менш надзейных крыніц. Калі гэтая інфармацыя паходзіць з нечых фантазій, то што тут можна каментаваць?".
Нагадаем, 6 верасня кіраўнік Беларусі Аляксандр Лукашэнка заявіў, што беларускі рубель пад прамысловасць дэвальвавацца не будзе, а будзе "ўмацоўвацца або аслабляцца ў залежнасці ад попыту і прапановы". Паводле Лукашэнкі, ніякай штучнай дэвальвацыі не будзе.
Фота — bymedia.net
