Золатавалютныя рэзервы Беларусі за лістапад выраслі на 177 млн долараў
Нацбанк, ілюстрацыйнае фота
Золатавалютныя рэзервы Беларусі ў лістападзе зноў павялічыліся. Іх рост склаў 177,2 млн долараў. Як паведамляе прэс-служба Нацыянальнага банка, па стане на 1 снежня 2025 года іх аб'ём склаў 13,9 млрд долараў у эквіваленце.
Варта адзначыць, што мэтавы арыенцір, які ставілі ўлады на канец 2025 года, быў 7,1 млрд долараў. Цяперашні паказчык амаль удвая перавышае яго.
Праўда, тэмпы росту запавольваюцца: у верасні прырост склаў 870 млн долараў, у кастрычніку — 440 млн долараў.
Рост ЗВР адбываецца ўжо некалькі месяцаў запар. Адным з асноўных фактараў называюць падаражанне золата на сусветных рынках. Таксама эксперты кажуць пра стабільную сітуацыю на ўнутраным валютным рынку, пастаянным прытоку экспартнай выручкі і сезоннае зніжэнне аб'ёму знешніх даўгавых выплат у канцы года.
