На выезд у Польшчу стаяць дзясяткі аўтобусаў
Аўтобусная чарга перад пунктам пропуску "Брэст" / t.me/granica_bypl
Паводле звестак Памежнага камітэта Беларусі, па стане на 10 гадзін раніцы 6 студзеня ў чарзе ў памежным пункце пропуску "Брэст" на выезд з нашай краіны стаяў 81 аўтобус і 830 легкавікоў.
У памежных чатах пасажыры актыўна абмяркоўваюць, як скарыстацца магчымасцю перасесці ў аўтобусы, якія стаяць бліжэй да Польшчы. Гэта каштуе 50 еўра. У выніку праходжанне мяжы займае каля 10 гадзін. Прайсці мяжу з Польшчы ў Беларусь — каля трох гадзін.
Як паведамляюць кіроўцы легкавікоў, ад пастаноўкі ў электронную чаргу да выкліку аўтамабіля на мяжу праходзіць каля сутак. Кантроль удаецца прайсці за тры-чатыры гадзіны.
Чэргі легкавікоў на выезд з Беларусі ёсць таксама ў Бераставіцы (108) і Брузгах (180). Больш нідзе чэргаў на выезд з Беларусі ў Еўрасаюз зранку 6 студзеня не было.
