На новым стадыёне хочуць праводзіць канцэрты. Так знішчылі газон "Дынама"
У чэрвені на Нацыянальным стадыёне згуляе свае хатнія матчы мінскае "Дынама" / abff.by
Новы Нацыянальны стадыён, пабудаваны Кітаем, плануюць выкарыстоўваць для правядзення канцэртаў. Пра гэта заявіў генеральны дырэктар стадыёна "Дынама" Аляксандр Бут-Гусаем.
— Сёлета трэба "абкатаць" гэты [новы] стадыён. Паглядзець, вывучыць увесь функцыянал да канца. А ўжо потым планаваць далейшае выкарыстанне. Паколькі цяпер гэта самая вялікая арэна ў краіне, у перспектыве, магчыма, тут будуць праводзіцца нейкія канцэрты, — сказаў Бут-Гусаем.
Таксама ён паведаміў, што на Нацыянальным стадыёне ў чэрвені свае хатнія матчы ў чэмпіянаце Беларусі правядзе сталічнае "Дынама".
Варта адзначыць, што хатнім стадыёнам дынамаўцаў заяўлены стадыён "Дынама". Але з-за розных нефутбольных мерапрыемстваў газон арэны быў фактычна знішчаны. Паглядзіце, як выглядаў газон пасля заафестывалю і паказу мод Fashion Fabrique.
Цяпер газон стадыёна "Дынама" праходзіць працэдуру аднаўлення.
Дададзім, што газон новага Нацыянальнага стадыёна ўнікальны для Беларусі. Поле абсталявана сістэмай умацавання натуральнага травянога пакрыцця шляхам яго "прашыўкі". У яго ўшытыя сінтэтычныя валокны для ўмацавання асновы газона.
На новай арэне ўжо прайшлі дзве гульні — моладзевых зборных Беларусі і Кітая, а таксама нацыянальных зборных Беларусі і Расіі. Федэрацыя футбола Беларусі прасіла ФІФА дазволіць правядзенне матча Беларусь - Шатландыя на новым стадыёне ў Мінску, але хадайніцтва было адхілена.
