КДБ вінаваціць чыгуначнага дыспетчара ў "здрадзе дзяржаве"
Андрэй Гаўрылюк / Супольнасць чыгуначнікаў Беларусі
Камітэт дзяржбяспекі вінаваціць цягніковага дыспетчара ўчастка Мінск — вузел Цэнтра кіравання перавозкамі (ЦКП) Андрэя Гаўрылюка ў "здрадзе дзяржаве". Пра гэта паведамляе Супольнасць чыгуначнікаў Беларусі.
Пра затрыманне Гаўрылюка стала вядома 8 лістапада 2025 года. Паведамлялася, што чыгуначніка затрымалі за ўдзел у кантрабандзе цыгарэтаў у Польшчу. У Супольнасці чыгуначнікаў кажуць, што Гаўрылюк сапраўды меў магчымасць складаць графікі так, каб кантрабандысты маглі загрузіць сваю прадукцыю ў вагоны. Але такая дзейнасць немагчымая без ведама і згоды яго кіраўніцтва.
Спярша дыспетчара вінавацілі ў атрыманні хабару і перавышэнні службовых паўнамоцтваў. Але цяпер да абвінавачанняў дадалі здраду дзяржаве. "Пры гэтым ледзь не афіцыйна і гучна заяўляецца, што Гаўрылюк супрацоўнічаў з замежнай разведкай", — адзначаюць чыгуначнікі.
На іх думку, на арыштаванага такім чынам спрабуюць ціснуць, бо ён не прызнаецца ў тым, што інкрымінуюць сілавікі."Ці, што хутчэй за ўсё, з гэтага дыспетчара хочуць зрабіць узорна-паказальнае пудзіла-страшылку для ўсіх астатніх", — вылучаюць версію ў Супольнасці чыгуначнікаў.
