Менш працаўнікоў — таму вышэйшы заробак: сітуацыя на рынку працы

17/04/2025 - 18:32

Што адбываецца на прадпрыемствах

Галоўная прычына росту заработнай платы ў Беларусі — устойлівы кадравы дэфіцыт. Такую выснову можна зрабіць з дакладаў чыноўнікаў, якія атрымалі і прааналізавалі ў BELPOL.

У справаздачы, якой арганізацыя падзялілася з Еўрарадыё, гаворыцца, што за 11 месяцаў мінулага года (студзень-лістапад) колькасць вакансій у Беларусі вырасла больш чым на чвэрць: паводле дадзеных Мінпрацы на 26,4% (або на 163,9 тыс. вакансій) і паводле сайта rabota.by — на 15,3%.

Адначасова колькасць занятых у эканоміцы скарацілася на 35 тысяч чалавек.

Наймальнікі прапануюць больш, чым чакаюць кандыдаты

Пра рост попыту на працаўнікоў сведчыць больш высокі ўзровень заробкаў, прапанаваных працадаўцамі (у сярэднім 1 636 рублёў паводле дадзеных сайта rabota.by), у параўнанні з медыянным заробкам, указаным кандыдатамі ў рэзюмэ (1 500 рублёў).

Для параўнання: у студзені 2024 года сітуацыя была процілеглай — кандыдаты чакалі заробак на ўзроўні 1 500 рублёў, тады як працадаўцы прапаноўвалі ў сярэднім 1 414 рублёў.

Працаўнікі больш нагружаныя

У студзені-лістападзе 2024 года колькасць працаўнікоў знізілася на 1,6%, і павялічылася колькасць унутраных сумяшчальнікаў на 4,4%. Выходзіць, што за кошт павелічэння выпрацоўкі на аднаго працаўніка ўзрасла ягоная сярэдняя заработная плата, адзначае BELPOL.

Што тычыцца вядучых прамысловых прадпрыемстваў Беларусі, то колькасць вакансій у 2024 годзе павялічылася на 10-15%. У выніку павялічылася нагрузка на рэшту працаўнікоў, што прывяло да росту іхняга сярэдняга заробку, нягледзячы на зніжэнне аб'ёмаў вытворчасці.

Да прыкладу:

ААТ "МТЗ" — больш за 1,6 тыс. вакансій, сярэдняспіскавая колькасць знізілася на 3,6%, сярэдняя заработная плата вырасла на 14,6% і склала 2 555 рублёў;
холдынг "БЕЛАЗ" — больш за 600 вакансій, сярэдняспіскавая колькасць знізілася на 1,7%, заработная плата вырасла на 10,8% (2 703,8 рубля);
ААТ "ГОМСЕЛЬМАШ" — больш за 270 вакансій, сярэдняспіскавая колькасць знізілася на 0,2%, заработная плата склала 2 138,3 рубля (рост у намінальным выражэнні — на 1,3%, што ніжэй за ўзровень інфляцыі).

Заработная плата ў рэальным выражэнні знізілася на 4,2%, адзначае BELPOL.

Разам з тым, тэмпы росту заробкаў у ААТ "МТЗ", холдынгу "БЕЛАЗ", ААТ "ГОМСЕЛЬМАШ" (101,3% - 114,6%) ніжэйшыя за тэмпы росту сярэдняга заробку агулам па краіне (119,4%).