Лукашэнка ўзнагародзіў прэзідэнта Сербіі ордэнам Дружбы народаў

Аляксандр Лукашэнка ўзнагародзіў прэзідэнта Сербіі Таміслава Нікаліча ордэнам Дружбы народаў. Такім чынам быў адзначаны яго ўнёсак ва ўмацаванне міру, сяброўскіх адносін і супрацоўніцтва краін. Нікаліч наведвае нашу краіну з працоўным візітам. Неўзабаве ў яго заканчваюцца паўнамоцтвы, прэзідэнтам Сербіі стане Аляксандр Вучыч. Падчас сённяшняй сустрэчы Лукашэнка згадаў сваю сустрэчу з Вучычам у Пекіне. “І я заўважыў, што той падмурак, які мы заклалі ў аснову аднаўлення нашых сяброўскіх адносін паміж праваслаўным народамі Беларусі і Сербіі, умацоўваецца”, — цытуе словы беларускага кіраўніка БЕЛТА.

Лукашэнка адзначыў, што тавараабарот паміж Беларуссю і Сербіяй за апошнія гады “павялічыўся ў разы”. “У нас няма закрытых тэмаў, — кажа кіраўнік Беларусі. — Вы павінны ведаць, што мы заўсёды з любоўю і павагай адносіліся да сербаў і будзем прытрымлівацца такой палітыкі”.

Адзначым, што кіраўнікі сербскай дзяржавы наведвалі Беларусь тры разы, Лукашэнка ездзіў у Сербію чатыры разы.