Літва вырашыла адкрыць мяжу з Беларуссю раней за запланаваны час

Урад Літвы на пасяджэнні 19 лістапада вырашыў адкрыць два пункты пропуску на мяжы з Беларуссю, часова закрытыя тры тыдні таму.

"Улічваючы рашэнні Нацыянальнай камісіі бяспекі, прынятыя 18 лістапада гэтага года, што абставіны змяніліся і абмежаванні на перасячэнне дзяржаўнай мяжы, вызначаныя 29 кастрычніка 2025 г. ( ... ) больш не з'яўляюцца неабходнымі для забеспячэння ўнутранай бяспекі, мэтазгодна адмяніць абмежаванні, устаноўленыя згаданай пастановай (...)", — перадае LRT выступ міністра унутраных спраў Уладзіслава Кандратовіча на пасяджэнні.

Паведамляецца, што пункты пропуску "Мядзінінкай" і "Шальчынкай" будуць адкрытыя ўжо з чацвярга, 20 лістапада.

Напярэдадні літоўскія ўлады паведамілі, што закрытыя пункты пропуску на мяжы могуць адкрыць раней за вызначаны тэрмін 30 лістапада. Прэм'ер-міністр Інга Ругінене спаслалася на рэкамендацыю Камісіі па нацыянальнай бяспецы, якая адзначыла скарачэнне патоку кантрабандысцкіх аэрастатаў і адсутнасць перашкод у працы Віленскага аэрапорта.

Паводле Ругінене, падрыхтоўка да адкрыцця мяжы зойме адзін дзень. Пры гэтым кіраўніца літоўскага ўрада падкрэсліла, што пры павышэнні ўзроўню пагрозы мяжа будзе зноў закрытая.