Беларускія перавозчыкі пачалі прадаваць квіткі ў Вільню на 21 лістапада

Беларускія перавозчыкі мяркуюць, што ўжо 21 лістапада адновяцца аўтобусныя рэйсы паміж Мінскам і Вільняй. Таму яны ўжо абвясцілі аб продажы квіткоў з гэтай даты.

Кампанія "Мінсктранс" плануе аднавіць 21 лістапада рух аўтобусаў у Вільню, Коўна і Рыгу. Таксама продаж квіткоў на гэтую дату пачаў перавозчык Eurolines.

Раней прэм'ер-міністр Літвы Інга Ругінене заяўляла, што рашэнне пра магчымае адкрыццё літоўска-беларускай мяжы можа быць прынята ў сераду, 19 лістапада.

Пад канец кастрычніка Літва закрыла ўсе пункты пропуску на беларускай мяжы да 30 лістапада. Гэта адбылося ў выніку частых масавых прылётаў кантрабандных метэазондаў з тэрыторыі Беларусі, якія перашкаджалі працы аэрапортаў. У адказ рэжым Лукашэнкі забараніў выезд літоўскіх грузавікоў і перамясціў фуры на спецыяльныя платныя стаянкі.

18 лістапада літоўскія і беларускія памежнікі правялі тэхнічныя перамовы наконт фураў. Камісія па нацыянальнай бяспецы Літвы рэкамендавала ўраду разгледзець на сённяшнім пасяджэнні магчымасць заўчаснага адкрыцця мяжы.