Неплацяжы беларускіх прадпрыемстваў за энергію пераходзяць з 2025 года ў 2026-ы

Па стане на 26 студзеня 2026 года памер аплаты прадпрыемстваў Беларусі за энергарэсурсы, спажытыя ў студзені, склаў толькі 50,7% па газе і 78,2% па электрычнай і цеплавой энергіі. Такія лічбы ўказаны ў пратаколе пасяджэння Рэспубліканскай камісіі па кантролі за разлікамі за энерганосьбіты. Дакумент ёсць у распараджэнні рэдакцыі, ён атрыманы ад арганізацыі BELPOL.

Сярод злосных неплацельшчыкаў — буйныя прамысловыя прадпрыемствы, якія не плацілі за энергію ўвесь мінулы год. Пра іх Еўрарадыё пісала нядаўна.

ААТ "Гомельшкло" (з філіяламі) не разлічылася ў поўным аб’ёме за прыродны газ, спажыты ў студзені–лістападзе 2025 года, і за электраэнергію ў снежні.

ААТ "Палессе" не аплаціла поўнасцю электраэнергію за жнівень–снежань 2025 года. Прадпрыемства абавязалі да 30 студзеня цалкам аплаціць электраэнергію за снежань 2025 года. За студзень 2026 года прадпрыемства таксама павінна цалкам разлічыцца: да 20 лютага — за электраэнергію, а да 27 лютага — за прыродны газ.

ААТ "Гродзенскі шклозавод" і ААТ "Шклозавод “Нёман”" не разлічыліся яшчэ за газ, спажыты ў снежні. А цяпер іх абавязалі да 31 студзеня 2026 года цалкам разлічыцца за газ, спажыты ўжо ў студзені.

ААТ "Мінскі падшыпнікавы завод" не аплаціла ў поўным аб’ёме энергарэсурсы за ўвесь 2025 год.

ААТ "Маладзечанскі завод металаканструкцый" не пагасіла запазычанасць за электрычную і цеплавую энергію ў адпаведнасці з зацверджанымі графікамі.

Кіруючая кампанія холдынга "Беларуская цэментная кампанія" не пералічыла ў тэрмін сродкі за пастаўленае тарфяное паліва: да 15 студзеня 2026 года неабходна было заплаціць не менш за 4,3 млн рублёў, з іх 2 млн — да 12 студзеня.

Міністэрству прамысловасці даручана да 6 лютага 2026 года забяспечыць поўную аплату энергіі, спажытай у студзені, для ААТ "БМЗ" — кіруючая кампанія холдынга "БМК", ААТ "Мінскі трактарны завод", ААТ "Гомсельмаш" (з філіяламі) і ААТ "Гомельскі завод ліцця і нармаляў".

ААТ "Магатэкс" абавязалі да 30 студзеня аплаціць не менш за 50% электраэнергіі і поўнасцю — прыродны газ, спажытыя ў студзені 2026 года. Астатнюю частку за электраэнергію прадпрыемства павінна пералічыць да 10 лютага.

ААТ "Камволь" павінна да 12 лютага поўнасцю аплаціць энергарэсурсы за студзень 2026 года.

Для ААТ "Магілёўхімвалакно" ўсталяваны двухэтапны графік: да 30 студзеня — не менш за 50% аплаты, да 12 лютага — поўны разлік за студзеньскае спажыванне.

Калі прадпрыемствы не выканаюць гэтыя абавязацельствы і даручэнні, прадугледжаны жорсткія меры.

Падачу прыроднага газу могуць абмежаваць на 25% для ААТ "Белмедшкло", "Палессе", "Магатэкс", "Світанак" і "Беларускі цэментны завод".

Для "Гродзенскага шклозавода" не будзе адноўлена падача газу на раней адключанае абсталяванне.

На чатырох кацельных устаноўках ААТ "Камволь" газ могуць цалкам адключыць.