Лібер адказаў на абвінавачванні стартапера, які нібыта ўзламаў "Новую Беларусь"

19/05/2025 - 21:47

Павел Лібер / Еўрарадыё

Стартапер Аляксей Бурбіцкі сцвярджае, што цэлы год працаваў у камандзе стваральніка праекта "Новая Беларусь" (SVAE) Паўла Лібера. Паводле яго слоў, платформу ўзламалі ў пачатку года, і дадзеныя карыстальнікаў маглі быць скрадзеныя.

Сам Лібер сцвярджае, што Бурбіцкі хоць і спрабаваў трапіць у яго каманду, але ні дня там не папрацаваў. І тлумачыць: У "Новай Беларусі" немагчыма нічога скрасці, таму што "Новая Беларусь" не захоўвае ніякіх персанальных дадзеных.

Для Еўрарадыё Лібер распавёў, ці варта карыстальнікам аплікацыі перажываць — і ці перажывае праз інфармацыйную атаку ён сам. Стваральнік "Новай Беларусі" адказвае на самыя вострыя пытанні.

Дадзеныя карыстальнікаў маглі сплысці?

Лібер: Дастаткова проста спампаваць і адкрыць аплікацыю "Новая Беларусь", каб убачыць, што яно не збірае ніякіх дадзеных. Усё, што можна там пакінуць, — email, і то мы просім ўводзіць ананімны адрас.

У сетку выкладваюцца нейкія скрыншоты з кучай персанальных звестак, лічбамі страховак і ўсяго астатняга, але мне хочацца спытаць — куды ўсе гэтыя звесткі ўводзіць у "Новай Беларусі"? Аплікацыя "Новая Беларусь" — гэта такі культурны агрэгатар. У нас ёсць фундаментальнае правіла: мы стараемся не збіраць ніякіх персанальных дадзеных. І гэта асноўны прынцып нашай аплікацыі. Таму што нам прасцей іх не збіраць, чым тлумачыць, як яны захоўваюцца і хто мае да іх доступ.

Адзінае, што можна скрасці ў "Новай Беларусі", — базу емейлаў, большасць з якіх выдуманыя, сцёбныя. Але нават да гэтай інфармацыі маюць доступ усяго два чалавекі з каманды, якія працуюць з намі з 2020 года. Мы не пускаем выпадковых людзей з вуліцы ўжо даўным-даўно, таму што думаем, што "наша параноя недастатковая".

А дадзеныя бізнэсаў з "Баймапки" можна скрасці?

Лібер: “Баймапка” — гэта наш партнёрскі прадукт, на гэтай платформе зарэгістравана прыкладна 2500 бізнэсаў. Бізнэсы падаюць інфармацыю пра сябе праз публічную форму, і гэтая форма таксама не ўтрымлівае ніякіх асабістых дадзеных. Дадзеныя, якія ўладальнікі бізнесу ўводзяць у гэтую форму, нічым не адрозніваюцца ад інфармацыі, якая ёсць у адкрытых крыніцах.

Вы можаце проста зайсці на "Баймапку" і ўбачыць гэтую форму. Тое, што ў яе ўнеслі, і з'яўляецца на карце. Ніякіх адчувальных дадзеных.

Хто такі "стартапер Аляксей"? Ён праўда працаваў з Ліберам?

Лібер: У відэа, якое апублікаваў Аляксей Бурбіцкі, ён спрабуе пазіцыянаваць сябе як наш былы распрацоўшчык — і гэта няпраўда. Аляксей ніколі ў нас не працаваў.

На пачатку красавіка ён актыўна шукаў мае кантакты і кантакты маёй каманды. Пісаў нам з прапановай інтэграцыі за грошы, прасіў, каб мы распавядалі пра яго стартап, запрашаў мяне на яго прэзентацыю. Але мы адмовілі яму ў супрацоўніцтве і не прынялі ў каманду.

Чаму? Ён быў занадта дакучлівым. Ён нас проста ўсюды дастаў. Пісаў у сацсетки, пісаў на электронную пошту. У нас засталіся ўсе гэтыя яго лісты. Ён пісаў нават у чат беларусаў Вільні. Яшчэ ў красавіку ён шукаў праз чат мае кантакты, хоць сцвярджае, быццам працаваў у нас са студзеня.

І калі табе піша чалавек з такой маніякальнай настойлівасцю, з ім прасцей не мець зносін. Але нават калі б мы і выйшлі з ім на сувязь, ён наўрад ці трапіў бы да нас у каманду, проста не прайшоў бы тэхнічнае інтэрв'ю. Чалавек пазіцыянуе сябе як малады стартапер, але нічога рэальнага за яго стартапам не стаіць — каб зразумець гэта, дастаткова проста адкрыць яго сайт.

Чаму гэтая атака здарылася менавіта сёння?

Лібер: Таму што панядзелак?

Насамрэч беларуская прапаганда рэгулярна праходзіцца па нашых прадуктах, і гэта для нас ужо такая нармальнасць. Але я б адзначыў, што гэты ўкід быў падрыхтаваным.

Аляксей сапраўды спрабаваў падабрацца да каманды, замацавацца, каб мець магчымасць казаць, што працаваў з намі. А гэта значыць, што інфармацыйныя ўкіды беларускай прапаганды становяцца якаснейшымі, а прадэмакратычным арганізацыям трэба быць удвая больш асцярожнымі і правяраць, з кім яны маюць зносіны і каго бяруць у каманду. Гэта стандартная інфармацыйная гігіена.