Латвія ўводзіць платную электронную чаргу на мяжы
Беларуска-латвійская мяжа / Мытны камітэт
Для перасячэння латвійскай мяжы з 15 кастрычніка 2025 года транспарту давядзецца рэгістравацца ў электроннай чарзе і плаціць за гэта.
Адпаведнае рашэнне прыняў 23 верасня ўрад краіны, паведамляюць латвійскія СМІ. Мяркуецца, што новаўвядзенне ўпарадкуе рух на мяжы, дазволіць скароціць чэргі і павысіць эфектыўнасць прапускнога рэжыму.
Усе кіроўцы, якія перасякаюць мяжу Латвіі будуць абавязаныя зарэгістраваць свае аўтамабілі ў сістэме браніравання электроннай чаргі і аплаціць збор — 9,3 еўра. Гэтая мера будзе дзейнічаць і на пункце пропуску "Патэрніекі" на мяжы з Беларуссю (з беларускага боку "Грыгараўшчына").
Запісацца ў электронную чаргу можна будзе ўжо з 1 кастрычніка.
Ад аплаты гэтага збору будуць вызваленыя конныя экіпажы, раварысты, аўтобусы, якія займаюцца рэгулярнымі пасажырскімі перавозкамі, і некаторыя іншыя (аднак аўтобусы абавязаныя прайсці рэгістрацыю).
