Краіны ЕС узгаднілі запуск новай сістэмы ўезду ў Шэнгенскую зону

Краіны ЕС 5 сакавіка ўзгаднілі запуск новай сістэмы ўезду ў Шэнгенскую зону. Яна будзе рэгістраваць уезд і выезд грамадзян трэціх краін у Шэнгенскую зону, паведамляе DW.

Галоўнае новаўвядзенне, запланаванае ўновай сістэме, — замест штампа ў пашпарце будуць выкарыстоўвацца біяметрычныя даныя для распазнання твараў ці адбіткаў пальцаў. Мяркуецца, што новая сістэма паскорыць доступ да інфармацыі, чым здолее дапамагчы ў барацьбе з міжгранічнай злачыннасцю і тэрарызмам.

У Бруселі чакаюць, што краіны-чальцы ЕС і Еўрапейскі парламент канчаткова аформяць новыя правілы да канца гэтага года, але канкрэтная дата не прызначаная. Пасля таго, як правілы набудуць моц, пачнецца пераходны этап, які працягнецца каля шасці месяцаў.

У новай сістэме прымуць удзел усе краіны — чальцы ЕС, акрамя Кіпра і Ірландыі. Таксама да яе далучацца чатыры асацыяваныя чальцы Шэнгенскага пагаднення — Ісландыя, Ліхтэнштэйн, Нарвегія і Швейцарыя.

На Кіпры і ў Ірландыі штампы ў пашпартах будуць прастаўляць уручную, як і раней.