Кіраўніца Еўракамісіі прэзентуе план пераўзбраення Еўрасаюза

Старшыня Еўракамісіі Урсула фон дэр Ляен прэзентуе план пераўзбраення ЕС і падтрымкі Украіны. Пра гэта гаворыцца ў яе лісце краінам — чальцам ЕС, які апынуўся ў распараджэнні Радыё Свабода.

Прэзентацыя плана адбудзецца на гэтым тыдні. Ён мае назву REARM Europe. Прапанаваныя захады канцуюцца на неабходнасці "тэрмінова і значна павялічыць нашы выдаткі на бяспеку і абарону Еўропы", гаворыцца ў лісце.

Фон дэр Ляен назвала пяць пунктаў плана:
— стварэнне новага фінансавага інструмента ЕС для павелічэння абаронных магчымасцяў краін-чальцоў. У яго рамках плануецца выдача дзяржавам крэдытаў на агульную суму 150 мільярдаў еўра на ўзмацненне абароны;
— вызваленне дзяржаўных сродкаў для фінансавання абароны краін на нацыянальным узроўні;
— стымуляванне інвестыцыяў у абарону празь бюджэт ЕС. У тым ліку прапануецца зняць цяперашнія абмежаванні на падтрымку буйных абаронных карпарацый; павялічыць фінансавыя стымулы, такія як папярэдняе фінансаванне і суфінансаванне; спрасціць працэс добраахвотных трансфераў у іншыя фонды ЕС з мэтай абароны ды інш.;
— унёсак Еўрапейскага інвестыцыйнага банка ў фінансаванне абароны краін ЕС, пашырэнне аб’ёму іх фінансавання;
— мабілізацыя прыватнага капіталу. Краінам ЕС прапануецца забяспечыць сваім кампаніям і прамысловасці лепшы доступ да капіталу, фінансавання.

Сумарна плануецца разблакаваць за бліжэйшыя гады не менш як 800 млрд еўра дадатковых ваенных выдаткаў.

Заявы прагучалі пасля канфлікту паміж прэзідэнтам ЗША Дональдам Трампам і прэзідэнтам Украіны Уладзімірам Зяленскім. Сёння стала вядома, што Трамп загадаў прыпыніць усе ваенныя пастаўкі Украіне, у тым ліку тыя, што ўжо былі ў дарозе.