Расія выкарыстала сотавыя вышкі ў Беларусі для залётаў дронаў у Польшчу
Беларуская інфраструктура выкарыстоўвалася для адпрацоўкі ўдару па краіне НАТА / probusiness.io
Расія актыўна выкарыстоўвала грамадзянскую інфраструктуру, у прыватнасці вышкі сотавай сувязі на тэрыторыі Беларусі, для пракладання маршрутаў сваіх дронаў. Пра гэта гаворыцца ў расследаванні міжнароднай разведвальнай супольнасці InformNapalm.
Залёт дзясяткаў расійскіх дронаў у Польшчу ў ноч з 9 на 10 верасня 2025 года быў элементам тэставання новай тактыкі і магчымасцяў беларускай грамадзянскай інфраструктуры сотавай сувязі, сцвярджаюць аўтары матэрыялу.
Гэтая інфармацыя атрымана ў ходзе працяглай кібераперацыі, якую праводзілі ўкраінскія хакеры аналітычнага кіберцэнтра Fenix пры падтрымцы валанцёраў InformNapalm.
Вышкі сотавай сувязі на тэрыторыі Беларусі забяспечвалі ўстойлівы сігнал для расійскіх дронаў, якія спрабавалі дасягаць цэляў, размешчаных на паўночных і заходніх межах Украіны. У асобных выпадках яны заляталі нават на тэрыторыю некаторых краін НАТА, і гэта не было выпадковасцю.
На думку аўтараў расследавання, залёты расійскіх дронаў у Польшчу ў верасні 2025 года былі элементамі вучэнняў і тэставання магчымасцяў беларускай грамадзянскай інфраструктуры сотавай сувязі, каб у далейшым планаваць аперацыі ўдараў па лагістычных маршрутах як на тэрыторыі Украіны, так і на тэрыторыі Польшчы — з мэтай адрэзаць Украіну ад паставак заходняга ўзбраення і тэхнікі.
Кібераперацыя працягвалася больш за шэсць месяцаў.
