Калі можна атрымаць адпачынак грашыма? Растлумачылі ў Мінпрацы

Адпачынкавыя дні можна замяніць грашовай кампенсацыяй, але толькі ў асобных выпадках, паведамляе Міністэрства працы і сацыяльнай абароны.

"Кампенсацыя замест адпачынку магчымая, калі работніка адклікалі з адпачынку, і ён ужо выкарыстаў не менш за 14 каляндарных дзён адпачынку ў гэтым годзе", — тлумачаць у ведамстве.

Таксама грашовую кампенсацыю за нявыкарыстаныя дні адпачынку можна атрымаць пры звальненні — у такім разе яна выплачваецца за ўсе дні, якія засталіся.

Калі ж з адпачынку вас не вярталі прымусова, і звальняцца вы не збіраецеся, то адпачываць прыйдзецца па-сапраўднаму — не менш за 21 дзень. Астатнія дні можна папрасіць замяніць на грашовую кампенсацыю.

"І толькі ў тым выпадку, калі адпачынак не прадастаўляецца авансам і такі варыянт задавальняе наймальніка", — дадаюць у Мінпрацы.

Каму не дадуць грошы замест адпачынку? Працоўныя шкодных і небяспечных вытворчасцяў, работнікі ў зонах радыеактыўнага забруджвання, цяжарныя жанчыны і непаўналетнія — усе яны абавязкова павінны скарыстацца поўным адпачынкам. Грашовая замена для іх не прадугледжана.