Гулец "Манчэстэр Сіці" нагадаў, што пачынаў прафесійную кар’еру ў Беларусі

— Я пачынаў прафесійную кар’еру ў Беларусі, заўсёды выбіраў найлепшых трэнераў, — заявіў узбекскі футбаліст Абдукадыр Хусанаў у першым інтэрв’ю для клубнай прэс-службы “Манчэстэр Сіці”.

20 студзеня клуб англійскай Прэм’ер-лігі “Манчэстэр Сіці” абвясціў пра падпісанне кантракту з абаронцам зборнай Узбекістана.

— Я вельмі рады далучыцца да гэтай каманды. Я прыйшоў сюды, каб развівацца і расці, а таксама выйграваць трафеі з “Сіці”. Гэта адна з найлепшых каманд у футболе, і тут працуе адзін з найлепшых трэнераў у свеце. Вось чаму я тут.

Я пачаў сваю кар’еру ў камандзе “Тошкуч”. Затым перайшоў у акадэмію “Бунёдкора”, адкуль адправіўся ў Беларусь, дзе пачаўся мой прафесійны футбольны шлях.

Калі мне было 18 гадоў, я пераехаў у Францыю. Я быў у Францыі, а цяпер знаходжуся тут, у “Манчэстэр Сіці”.

Я заўсёды выбіраў найлепшых трэнераў. Цяпер я таксама прыйшоў сюды, каб працаваць з лепшымі, — сказаў Хусанаў.

Хусанаў перайшоў у французскі “Ланс” з беларускага клуба “Энергетык-БДУ” летам 2023 года і зарэкамендаваў сябе як адзін з самых цікавых маладых абаронцаў у Лізе 1, — адзначае прэс-служба англійскага гранда.

Хто такі Абдукадыр Хусанаў

Абдукодыр Хусанаў — 21-гадовы ўзбекскі футбаліст. Футболам пачаў займацца з пяці гадоў. Першай футбольнай школай Абдукадыра стаў клуб “Тошкуч”. Затым ён перайшоў у “Бунёдкор”, дзе трэніраваўся разам з хлопцамі 2002 года нараджэння [сам Хусанаў 2004 года нараджэння — Еўрарадыё].

Прафесійную кар’еру Хусанаў пачаў у беларускім клубе “Энергетык-БДУ” ў 2022 годзе. Ужо ў ліпені 2023 года ён перайшоў у французскі “Ланс”, дзе хутка зарэкамендаваў сябе як адзін з самых перспектыўных маладых абаронцаў Лігі 1.

20 студзеня 2025 года “Манчэстэр Сіці” афіцыйна абвясціў пра падпісанне кантракту з Абдукадырам Хусанававым да лета 2029 года. Сума трансферу склала 40 млн еўра з улікам бонусаў.

“Энергетык-БДУ” павінен атрымаць мінімум 269 тысяч еўра за трансфер Хусанава ў “Манчэстэр Сіці” з “Ланса.

Па інфармацыі журналіста Нарзулы Сайдулаева, гадавая зарплата Хусанава ў "Манчэстэр Сіці" складзе каля 3,5 мільёнаў еўра.

У новай камандзе Хусанаў будзе выступаць пад 45-м нумарам.