Карлас Алас хоча пераканаць гульца мадрыдскага «Рэала» выбраць Беларусь

— Маёрава ўжо запрашалі ў рэгіянальную зборную ў яго ўзроставай катэгорыі — гэта крок, які папярэднічае выкліку ў зборную Іспаніі, — распавёў галоўны трэнер зборнай Беларусі па футболе Карлас Алас у інтэрв'ю bet.news.

12-гадовы беларускі футбольны талент Аляксей Маёраў з'яўляецца гульцом акадэміі мадрыдскага "Рэала". У 2023 годзе сям’я Аляксея пераехала з Беларусі ў Іспанію.

Алас паведаміў, што плануе наведаць Іспанію і сустрэцца з Маёравым і яго бацькамі.

— Паспрабую схіліць яго да таго, каб выступаць за Беларусь. Бо я ведаю, як працуе з юнымі гульцамі Федэрацыя футбола Іспаніі. Таму трэба заняцца гэтым як мага раней, каб Аляксей зрабіў выбар на карысць Беларусі, — дадаў трэнер.

Хлопец пачынаў трэніравацца ў Беларусі, яго талент і настойлівасць, падмацаваныя падтрымкай бацькі, прывялі да таго, што яго ў раннім узросце заўважылі скаўты расійскіх клубаў. Але сям’я выбрала заходні кірунак развіцця юнага таленту.

У 2024 годзе Аляксей падпісаў кантракт з акадэміяй мадрыдскага "Рэала", стаўшы самым дарагім гульцом свайго пакалення — клуб выкупіў яго кантракт за 120 000 еўра.

У адным з матчаў юнацкай Ла Лігі супраць "Сан-Бласа" ён аформіў покер, забіўшы чатыры галы.

Аляксей Маёраў ужо паспеў стаць лепшым бамбардзірам на юнацкім турніры ў Партугаліі, забіўшы сем мячоў у трох матчах.

Яго мэта — трапіць у асноўную каманду "Рэала".