Еўракамісія выдзеліць больш грошай краінам, што мяжуюць з Беларуссю

Краіны Еўрапейскага саюза, якія маюць агульную мяжу з Беларуссю і Расіяй, атрымаюць дадатковае фінансаванне, паведаміла кіраўніца Еўракамісіі Урсула фон дэр Ляен падчас візіту ў Польшчу.

Гэта тычыцца сродкаў, якія будуць закладзены ў сямігадовы бюджэт ЕС. Мяркуецца, што ў яго будзе ўключана ў тры разы больш сродкаў на выдаткі, звязаныя з пераадоленнем наступстваў міграцыі і аховай межаў. Таксама ў пяць разоў павялічацца сродкі, выдзеленыя на абарону, і ў дзесяць разоў — на ваенную мабільнасць.

"Краіны-члены ЕС, якія маюць прамыя мяжы з Расіяй і Беларуссю, атрымаюць дадатковыя сродкі", — цытуе фон дэр Ляен літоўскае выданне LRT.

Па словах кіраўніцы Еўракамісіі, мяжы ЕС з Беларуссю і Расіяй — агульная адказнасць усіх краін, якія ўваходзяць у аб’яднанне.

З пятніцы Урсула фон дэр Ляен знаходзіцца з візітам у краінах, якія складаюць усходнюю мяжу Еўрапейскага саюза. Яна ўжо наведала Латвію, Эстонію і Фінляндыю, а пасля візіту ў Польшчу накіруецца ў Балгарыю, Літву і Румынію.