Дзмітрый Баскаў стаў саўладальнікам браварні "Бівер"
Дзмітрый Баскаў / ФХБ
Член Савета Рэспублікі Дзмітрый Баскаў стаў саўладальнікам браварні "Бівер". Гэта наступны яго бізнэс пасля нядаўна набытай сеткі дыскаўнтараў.
У "Біверы" былы кіраўнік Федэрацыі хакея Беларусі мае долю ў 25% акцый, заўважылі расследавальнікі з "Бюро".
Акрамя Баскава акцыямі кампаніі валодае венгерская "Зіптэх" (11,85%) і Дзяніс Сташкевіч (7,45%) — бізнес-партнёр Баскава па шэрагу іншых праектаў. Кантрольны пакет застаецца ў кампаніі "Бівер клуб", звязанай з сям’ёй Бабровічаў — заснавальнікаў браварні "Бівер".
Дзмітрый Баскаў — функцыянер з хакейнай абоймы Аляксандра Лукашэнкі, былы асабісты трэнер яго малодшага сына Мікалая. Міжнародная федэрацыя хакея дыскваліфікавала яго на пяць гадоў за палітычны пераслед спартоўцаў і злоўжыванні службовым становішчам. Пасля гэтага Лукашэнка прызначыў Баскава ў Савет Рэспублікі.
Яго падазраюць у прысутнасці на "Плошчы Пераменаў" у вечар забойства актывіста Рамана Бандарэнкі ў лістападзе 2020-га.
