Даішнікі пад Магілёвам зладзілі пагоню са стралянінай

У ноч на 8 верасня супрацоўнікі ДАІ ў Магілёўскім раёне зладзілі пагоню са стралянінай.

Здарэнне адбылося каля вёскі Гаі, дзе патрульныя падалі сігнал аб спыненні кіроўцу БМВ, які ён праігнараваў. Даішнікі кінуліся ў пагоню.

Парушальнік, як паведамляецца, не рэагаваў на неаднаразовыя законныя патрабаванні спыніцца. Ён толькі павялічыў хуткасць. Пасля папярэджання аб выкарыстанні зброі інспектар пачаў страляць па колах аўто. Машыну спынілі.

Выявілася, што за рулём быў 23-гадовы жыхар Магілёва, якога сёлета ў ліпені пакаралі за выезд на паласу сустрэчнага руху і пазбавілі права кіравання транспартам. На маладога чалавека склалі восем адміністрацыйных матэрыялаў, у тым ліку за непадпарадкаванне законным патрабаванням супрацоўнікаў міліцыі. Магілёўца адправілі ў ІЧУ, а аўтамабіль — на ахоўную стаянку.