Беларускі "Ізавак" пастаўляе прадукцыю расійскаму ВПК. Расследаванне

24/04/2025 - 17:13

Новае расследаванне БРЦ / investigatebel.org

Беларускі расследавальніцкі цэнтр выпусціў новы матэрыял пра беларускую кампанію "Ізавак", якая пастаўляла сваю прадукцыю прадпрыемствам расійскага ВПК на сотні мільёнаў долараў падчас поўнамаштабнай вайны ва Украіне.

Еўрарадыё пераказвае тэкст расследавання.

Інавацыі без авацый

Кампанія "Ізавак" ужо 33 гады займаецца вакуумнымі тэхналогіямі. У мінулым фірма ўдзельнічала ў вытворчасці прадукцыі Apple: пры дапамозе абсталявання "Ізавака" на экраны першых кампутараў iMac наносілі ахоўны слой.

Акрамя Apple сярод кліентаў "Ізавака" былі Tesla, Samsung, LG, Sharp і іншыя.

У групе кампаній "Ізавака" ёсць фірма "Ізатэк-М", якая і займаецца "цёмнымі схемамі".

У Расіі з тэхналогіяй…

У снежні 2023 года "Ізатэк-М" прадала расійскай кампаніі ТАА "НМ-Тэх" ужываную ўстаноўку плазменнага траўлення амерыканскай гандлёвай маркі Applied Materials. Гэта важны і дэфіцытны для Расіі кампанент вайсковай тэхнікі.

Пастаўкі такой амерыканскай тэхнікі ў Расію забароненыя правіламі экспартнага кантролю ЗША.

У 2024 годзе "НМ-Тэх" дадаў да сваіх шматлікіх відах дзейнасці новы — вытворчасць зброі і боепрыпасаў.

Разам з "Ізавакам" "Ізатэкам-М" валодае зарэгістраваная на Тайвані кампанія More Tech International Corporation.

Адказы на Тайвані

Журналіст БРЦ пад выглядам патэнцыйнага кліента высветліў, што ў Tech International Corporation быў, як мінімум, адзін праект з расійскім "HM-Тэх".

Далей журналіст БРЦ папрасіў дапамагчы з пастаўкай у Беларусь забароненага амерыканскага станка — аналагічнага таму, які "Ізатэк-М" даставіў "НМ-Тэху". Новы атрымаць немагчыма, а вось ужываны можна дастаць з Кітая.

БРЦ знайшоў такую пастаўку ў базах дадзеных з кітайскімі знешнегандлёвымі аперацыямі.

У снежні 2023 года беларуская кампанія "Ізатэк-М" атрымала станок Amat Centura SuperE ад Ганконгскай Smart Kit Technology Limited, якая цяпер знаходзіцца пад санкцыямі ЗША.

У тым жа месяцы "Ізатэк-М" прадаў агрэгат той жа мадэлі і такой жа вагі расійскаму "НМ-Тэху". Толькі на $600 тыс. даражэй: купіў у Кітаі за $3,6 млн, а прадаў — за $4,2 млн.

Мільёны долараў

Прамежкавым звяном у пагадненні паміж "НМ-Тэх" і "Ізатэк-М", піша БРЦ, выступіла расійскае ТАА "Інжынірынг груп". У першыя два гады поўнамаштабнай вайны гэтая кампанія атрымала ад "НМ-Тэх" больш за $100 млн. Гэтая фірма не толькі дапамагала "НМ-Тэх" наладзіць вытворчасць чыпаў і мікрасхем, але і навучала супрацоўнікаў працаваць на пастаўленым абсталяванні.

Апошні рахунак паміж дзвюма кампаніямі, які ёсць у распараджэнні БРЦ, аплацілі ў ліпені 2024 года, а ў жніўні "Інжынірынг груп" трапіла пад санкцыі ЗША.

Сярод кліентаў "Інжынірынг груп" БРЦ выявіў больш за 30 кампаній, якія звязаны з ваеннай прамысловасцю.

Больш падрабязна пра расследаванне чытайце на сайце БРЦ.