Беларус, якога сваталі ў “Легію”, нечакана стаў трэнерам “Пары НН”

Беларускі трэнер Аляксей Шпілеўскі ўзначаліў расійскі клуб “Пары НН”. Кантракт разлічаны на тры года. Па выніках мінулага сезона каманда вылецела з Прэм’ер-лігі, але дзякуючы таму, што “Хімкі” не прайшлі ліцэнзаванне, “Пары НН” заняў іх месца ў вышэйшай лізе расійскага футбола.

Варта адзначыць, што папярэднім трэнерам таксама быў беларус — Віктар Ганчарэнка, які не здолеў выратаваць каманду ад вылету і быў звольнены кіраўніцтвам.

Шпілеўскі быў за крок ад пасады галоўнага трэнера варшаўскай “Легіі”, але бакі не здолелі дамовіцца. Таксама яго звязвалі з іншымі клубамі польскага Экстракласа.

Раней ён заяўляў, што не бачыць сябе ў Расіі і разглядае толькі заходні кірунак для свайго развіцця.

Шпілеўскі паспяхова праявіў сябе ў кіпрскім “Арысе”, дзе прывёў каманду да чэмпіёнства і Кубка краіны, зрабіўшы гучны выступ у Лізе Еўропы.

Нагадаем, што расійскія клубы знаходзяцца пад банам УЕФА і ім забаронена выступаць у еўрапейскіх турнірах.