Бацька ельскай школьніцы, якая памерла ў бальніцы, падаў заяву ў міліцыю
Памерлая ў Ельску дзяўчынка / фота з сацсетак
Бацька непаўналетняй школьніцы, якая памерла ў ельскай бальніцы, падаў заяву ў міліцыю. Пра гэта ён напісаў у сацсетках, заўважыла выданне "Флагшток".
Паведамляецца, што мужчына ў заяве апісаў сітуацыю. Дакумент павінен быць перададзены ў Следчы камітэт.
Дарэчы, Следчы камітэт і Мінздароўя працягваюць праверкі і экспертызы па факце смерці 14-гадовай школьніцы. Паводле бацькі дзяўчынкі, праверка будзе праводзіцца цягам двух месяцаў.
Як паведамлялася раней, школьніца раптоўна памерла 17 траўня. У той дзень дзяўчынку шпіталізавалі, а праз некалькі гадзін бацькам паведамілі, што яна знаходзіцца ў коме ў рэанімацыі. Да канца сутак школьніца памерла.
Пасля гэтага сацслужбы сталі ціснуць на братоў і сясцёр памерлай дзяўчынкі (у іх шматдзетная сям'я). Таксама пачаліся спробы ачарніць памяць памерлай дзяўчынкі: яе пачалі абвінавачваць у курэнні і кепскіх паводзінах.
Яе бацька пракаментаваў спробы прызнаць іх сям'ю ў сацыяльна небяспечным становішчы (СНС): "Ніколі не лічыў сваю сям'ю сацыяльна небяспечнай. Мы не алкаголікі, усе дзецьі здаровыя, накормленыя, апранутыя".
Ён падзякаваў усім за падтрымку і сказаў, што будзе чакаць афіцыйных вынікаў праверак і "дамагацца, каб стала вядомая праўда".
