31-гадовага мінчука затрымалі за падпал аўтамабіля ў Пружанах
Момант падпалу аўтамабіля / Кадр з відэа
31-гадовага мінчука затрымалі за падпал аўтамабіля ў Пружанах у Брэсцкай вобласці. Такім чынам мужчына вырашыў адпомсціць маці свайго дзіцяці за адмову ў спатканні з сынам. Ён спецыяльна прыязджаў у горад, каб наведаць сваё дзіця, якое жыве з яго былой 31-гадовай сужыцелькай.
Пасля таго, як спаткацца з сынам не ўдалося, мінчук паехаў на АЗС і купіў два літры бензіну. Ён знайшоў у двары дома машыну цяперашняга сужыцеля маці яго дзіцяці, разбіў правае пярэдняе пасажырскае шкло, наліў бензін у салон і падпаліў яго запальнічкай. Peugeot 407 быў моцна пашкоджаны, шкоду ацанілі на суму больш за 18 тысяч рублёў (яе зламыснік не кампенсаваў). Нязначна пацярпелі і прыпаркаваныя побач Opel Astra і Geely Atlas.
Цяпер мужчына ў ізалятары часовага ўтрымання. Распачатая крымінальная справа. Мінчуку пагражае да 10 гадоў зняволення. Раней ён ужо меў праблемы з законам.
