Жыхара Баранавічаў затрымлівалі пасля відэа ў TikTok

Жыхара Баранавічаў затрымлівалі пасля відэа ў TikTok. Падлеткам падалося, што ў яго пад курткай быў пісталет.

Усё пачалося з відэа, якое апублікавала 14-гадовая школьніца. Яна расказала пра здарэнне з яе знаёмымі. Міліцыя знайшла спачатку яе, а пасля — знаёмых. Яны расказалі, што сядзелі на лаўцы ў двары дома, калі да іх з аднаго з пад'ездаў дома падышоў мужчына і пацікавіўся, дзе цяпер адпачывае моладзь. Школьнікі адказалі, што ў цэнтры горада. Пасля гэтага мужчына пачаў нешта даставаць з-пад курткі. Падлеткі спалохаліся і ўцяклі. Што даставаў мужчына, яны не бачылі.

Як піша "Наш край", міліцыя знайшла мужчыну. Ён быў п'яны. "Нічога забароненага" пры ім не было, у тым ліку і зброі. 40-гадовы жыхар Баранавічаў расказаў, што ў той дзень выпіваў і перыядычна выходзіў на вуліцу папаліць. Пра тое, што ён размаўляў з падлеткамі, не памятае. А ва ўнутранай кішэні курткі носіць мабільны тэлефон, які перыядычна дастае, каб правяраць паведамленні. Відаць, міліцыянты праверылі і тэлефон.