За нанесеную піратэхнікай шкоду можа пагражаць крымінальная адказнасць

За нанесеную піратэхнікай шкоду можа пагражаць крымінальная адказнасць. Пра гэта нагадала мінская міліцыя. Адзначаецца, што піратэхніку забаронена выкарыстоўваць у грамадскіх месцах — у парках, на плошчах, у месцах, дзе знаходзіцца шмат людзей, каля жылых дамоў і аўтамабіляў. Дзеянні парушальнікаў могуць быць кваліфікаваныя як дробнае хуліганства. Пакаранне — штраф ад 46 да 690 рублёў, альбо адміністрацыйны арышт — да 15 сутак. Калі ж у выніку выкарыстання піратэхнікі здароўю грамадзян, іх маёмасці будуць нанесеныя сур’ёзныя страты, зламыснікі могуць трапіць пад крымінальную адказнасць, інфармуе БЕЛТА.

У Мінску міліцыя праводзіць праверку па факце з’яўлення ў сацсетках відэа, на якім відаць, як маладыя людзі кідаюць з аўтамабіля на вуліцу петарды. Дарэчы, у Барысаве ў адным з гаражоў праваахоўнікі знайшлі больш за 67 тысяч піратэхнічных вырабаў на агульную суму амаль 18 тысяч рублёў. За незаконны продаж піратэхнікі пагражае вялікі штраф.