Юнака з Магілёва вінавацяць у адмаўленні генацыду беларускага народу
Магілёўца вінавацяць у адмаўленні генацыду / Генпракуратура
У адмаўленні генацыду беларускага народу сілавікі абвінавачваюць 18-гадовага жыхара Магілёва. Пра гэта паведаміла прэс-служба Генпракуратуры.
Паводле інфармацыі ведамства, падставай для пераследу стаў каментар. Юнак напісаў яго ў верасні 2024 года ў агульнадаступным чаце Тэлеграма, дзе быў адміністратарам.
"Адмаўляў агульнавядомыя гістарычныя факты, у прыватнасці планамернае знішчэнне нямецка-фашысцкімі захопнікамі і іх памагатымі насельніцтва БССР у гады ВАВ, а таксама існаванне плана "Ост" нацысцкай Германіі", — гаворыцца ў паведамленні Генпракуратуры.
За такі каментар магілёўцу пагражае да 5 гадоў пазбаўлення волі. Цяпер яго ўзялі пад варту.
На відэа Генпракуратуры можна заўважыць, што на допыт юнака прывялі ў кайданках з рукамі, скутымі за спінай.
