Яшчэ адзін агрэгатар таксі выйдзе на беларускі рынак
Таксі, ілюстрацыйнае фота / Еўрарадыё
Новы агрэгатар таксі рыхтуецца да выхаду на беларускі рынак. Ён стане канкурэнтам "Яндэкс Go". Праект запускае кампанія А1, піша av.by.
Аб'ёмі беларускага рынку таксовак у А1 ацэньваюць у 1,3 мільярда рублёў за год. Пры гэтым адзін буйны агрэгатар займае больш за 90% рынку, што замінае развіваць сферу і ўплываць на цэны, кажа кіраўнік праекта "А1 таксі" Яўген Ляўданскі.
Паводле яго, А1 плануе стварыць нацыянальны таксі-сэрвіс. Цяпер А1 купіла адну з вядомых на гэтым рынку кампаній — "Баварыю". Яна спецыялізуецца на перавозках прэміум-класа.
У рамках праекта A1 запускае ўласную новую праграму-дадатак для таксовак. Кліенты змогуць замаўляць аўтамабіль на пэўную дату і час, а таксама (у пэўных тарыфах) змогуць выбіраць аўто і кіроўцу.
Паўнавартасны запуск сэрвісу плануецца сёлета ў траўні.
