Як прыватныя футбольныя клубы Вышэйшай лігі перажывуць новы ўказ Лукашэнкі?

29/09/2025 - 17:58

Падобна, што адзін праект дакладна зачыніцца

Падобна, што адзін праект дакладна зачыніцца / "Арсенал"

З 1 студзеня 2026 года зменяцца правілы спонсарства беларускага спорту. Паводле новага ўказу Аляксандра Лукашэнкі адмяняюцца падатковыя льготы на нерухомасць, зямельны падатак і падатак на прыбытак для спонсараў.

Новыя правілы гульні ўдараюць па прыватных футбольных клубах, якія выступаюць у Вышэйшай лізе беларускага футболу. Як піша “Трыбуна”, дзяржынскі "Арсенал" хутчэй за ўсё спыніць сваё існаванне.

Некалькі незалежных крыніц паведамілі выданню, што ўласнік клуба, бізнесмен Аляксей Мелешкевіч, стаміўся фінансаваць каманду з уласных сродкаў. Супрацоўніцтва з маскоўскім "Лакаматывам" не дало патрэбных фінансавых вынікаў, а знайсці спонсараў усё цяжэй, нягледзячы на існуючыя льготы.

Пры гэтым Мелешкевіч катэгарычна адмаўляецца аддаваць клуб дзяржаўным структурам. Калі ён не знойдзе новых інвестараў, то клуб з Дзяржынска можа спыніць сваю дзейнасць у найбліжэйшы час.

Свой шлях у "Іслачы"

Уладальнікі "Іслачы" падышлі да вырашэння пытання свайго існавання інакш. Зараз уласнікамі "ваўкоў" з’яўляюцца бізнесмены Уладзімір Пінчук і Віталь Курыла, але больш за 90% фінансавання каманда атрымлівае ад розных прадпрыемстваў.

Змененыя ўмовы патрабуюць замены такіх выдзяленняў дзяржаўнымі субсідыямі. Для атрымання субсідый прадпрымальнікі плануюць застацца мінарытарнымі акцыянерамі, а кантроль над клубам пяройдзе дзяржаўным структурам з Мінскага раёна. Дакладныя дэталі здзелкі пакуль невядомыя.

Пакуты БАТЭ

БАТЭ даўно знаходзіцца пад фінансавым ціскам, але імкнецца захаваць незалежнасць ад дзяржавы. Клубам валодаюць старшыня праўлення Андрэй Капскі, яго намеснік Міхаіл Дземянцэвіч і намесніца генеральнага дырэктара Алеся Катарыніч, якая з’яўляецца сястрой старшыні.

Паводле інфармацыі крыніц Трыбуны, Андрэй Капскі актыўна шукае інвестыцыі як у Беларусі, так і ў Расіі. Асаблівыя надзеі звязаныя з прызначэннем у жніўні спартыўнага дырэктара Дзяніса Сарсаніі, які мае сувязі ў расійскім футбольным свеце.

Нядаўна Капскі правёў сустрэчы з патэнцыйнымі інвестарамі, аднак вынікаў гэтых перамоў пакуль няма. Нягледзячы на складанасці, клуб працягне спробы знайсці прыватных спонсараў, каб пазбегнуць пераходу пад дзяржаўны кантроль.

Толькі "МЛ Віцебск" пакуль у шакаладзе

Пакуль толькі "букмекеры" з Віцебска застаюцца па-за ўплывам гэтых працэсаў дзякуючы прыватным фінансам. Палажэнне дзецішча букмекерскай канторы "Макслайн" Арцёма Лявонава выглядае стабільным. Клуб набывае спартыўныя аб’екты і будуе грандыёзныя планы.

Чым усё гэта абернецца, пакажа час.