Лукашэнка вырашыў канчаткова дабіць спорт новым указам. Меркаванне

19/09/2025 - 14:43

Аўстрыйскі клуб “Хартберг” усталяваў новы рэкорд у прафесійным футболе, прадэманстраваўшы ў 2025 годзе форму з 23 спонсарамі. У Беларусі такое проста немагчыма

Аўстрыйскі клуб “Хартберг” усталяваў новы рэкорд у прафесійным футболе, прадэманстраваўшы ў 2025 годзе форму з 23 спонсарамі. У Беларусі такое проста немагчыма / TSV Hartberg

Аляксандр Лукашэнка падпісаў новы ўказ "Аб аказанні падтрымкі спартыўным арганізацыям". Ён пачне дзейнічаць з 1 студзеня 2026 года. Адпаведна, дзеючы ўказ ад 2013 года спыняе сваё дзеянне. Запомніце гэтую дату, яна ўвойдзе ў каляндар як чарговая чорная дата ў гісторыі беларускага спорту.

Піша Максім Камерэр.

Згодна з новым указам адмяняюцца падатковыя льготы на нерухомасці, зямельны падатак і падатак на прыбытак для спонсараў, якія вырашаць падтрымаць беларускі спорт.

Менавіта яны ўсе гэтыя гады стымулявалі прыватны бізнес укладаць у беларускі спорт. Падобная сістэма не была ўнікальнай. Яе скапіявалі ў іншых краін, яна як-небудзь, але працавала.

Адмяніўшы яе, Лукашэнка дабівае тое, што засталося ад беларускага спорту. Узмацняецца кантроль над федэрацыямі, клубамі і спартсменамі, а бетынгавыя канторы становяцца каралямі.

Разбяром гэтае рашэнне на прыкладзе футбола. Уявім, энтузіясты вырашылі сабраць каманду, якая праб’ецца ў Вышэйшую лігу і будзе гуляць у еўракубках, атрымліваючы грошы ад УЕФА. Выдатны бізнэс-план: чатыры–пяць гадоў інвестыцый і потым грашовы паток, вяртанне ўкладанняў, перапродаж гульцоў і іншыя бонусы.

Знайсці спонсараў і раней, з указам пра льготы, пад такое было няпроста, а з новага года гэта стане чымсьці з вобласці фантастыкі.

Спорт — гэта не толькі сіла цела, гэта і сіла духу. А якая сіла духу ў цалкам несвабоднага чалавека?

Хто яшчэ выйграе ад адмены льгот? Бетінгавыя канторы, якія і так адчувалі сябе цудоўна, стануць проста каралямі. Вось у каго грошай будзе яшчэ больш, рэкламных месцаў яшчэ больш, уплыву на чалавечыя заганы яшчэ больш!

“МЛ Віцебск”, які жыве на грошы букмекерскай канторы, будзе новым гегемонам? Мы такі футбол хацелі ў Беларусі?

А як у суседзяў?

Просты і наглядны прыклад — Польшча. Тут бізнес мае льготы, калі спансіруе спорт. І што мы бачым на прыкладзе футбола?

Польшча ў сезоне 2026/27 заявіць два клубы ў Лігу чэмпіёнаў, а ўсяго ў еўракубках змогуць сыграць пяць клубаў з чэмпіянату Польшчы.

А ведаеце, якія справы былі ў сезоне 2018/19? Беларусь займала 21-е месца ў рэйтынгу УЕФА, а Польшча — 25-е месца.

Канешне, справа не толькі ў льготах. Але ў тыя часы беларускі футбол цягнуў БАТЭ, паказваючы ўсім прыклад, як можна граматна распараджацца, у тым ліку і льготамі.

Таму не здзіўляйцеся колькасці навінаў на Еўрарадыё пра беларускіх футбалістаў у польскім футболе.

Гэты тэкст-меркаванне аўтара, якое можа не супадаць (а можа і супадаць) з меркаваннем рэдакцыі Еўрарадыё. Калі вы таксама хочаце выказацца па актуальнай для Беларусі тэме — пішыце на [email protected] з пазнакай "Меркаванне".