Міністр спорту прапанаваў скараціць колькасць каманд у футбольнай Вышэйшай лізе

Сумесна з федэрацыямі мы павінны вызначыць неабходную колькасць клубаў, якія павінны быць прадстаўлены ў кожным відзе спорту ад кожнага рэгіёна, — падсумаваў міністр спорту Кавальчук.

Гісторыя пытання

У чэмпіянаце Беларусі ў 2012 годзе ўдзельнічалі 12 каманд — гэта была найменшая колькасць удзельнікаў за ўсю гісторыю незалежнай Беларусі.

У перыяд з 2007 па 2011 год і з 2013 па 2015 каманд было 14.

Пачынаючы з 2016 года медалі чэмпіянату разыгрываюць 16 каманд.

Чаму Кавальчук умешваецца ў справы беларускага футбола?

Пасля падзей 2020 года, калі многія спартсмены, у тым ліку футбалісты, падпісалі ліст супраць гвалту пасля прэзідэнцкіх выбараў, рэжым Лукашэнкі пачаў закручваць гайкі ў беларускім футболе. “Выдатнікам” у гэтай справе стаў міністр спорту Сяргей Кавальчук, былы ахоўнік Лукашэнкі.

Большасць клубаў Вышэйшай лігі фінансуюцца з бюджэту Беларусі, і Кавальчук пачаў уводзіць неафіцыйныя забароны. Футбалісты, якія падпісалі адкрыты ліст супраць гвалту, падвергліся рэпрэсіям — ім забаранілі гуляць у Беларусі. Многія з іх з’ехалі за мяжу, нехта нават завяршыў кар’еру.

Кавальчук забараніў замежныя зімовыя зборы. Увёў ліміт на зарплаты для гульцоў і трэнераў, што зрабіла беларускія клубы непрывабнымі для больш-менш класных легіянераў.

Міністэрства спорту пачало наўпрост умешвацца ў працу федэрацыі футбола, якая паводле статуту з’яўляецца незалежным органам. Аказваючы ціск на клубы, Мінспорту не падпісвала ім праграму развіцця, што запавольвала выдзяленне грошай ад прадпрыемстваў у якасці спонсарскай падтрымкі.

Кавальчук у канфлікце з федэрацыяй футбола зайшоў так далёка, што Мінспорту ўзяло на сябе правядзенне чэмпіянату ў Другой лізе. Такім чынам была разбурана пераемнасць і рост каманд, якія паводле спартыўнага прынцыпу павінны былі пераходзіць у больш моцную лігу. Недахоп фінансаў і адсутнасць перспектыў прымушалі пераможцаў Другой лігі адмаўляцца ад павышэння ў класе.

На пасяджэнні выканкама федэрацыі футбола 14 сакавіка 2025 года яе кіраўнік Мікалай Шарснёў уступіў у адкрытую перапалку з намеснікам міністра спорту Аляксандрам Дараховічам. Дайшло да таго, што прадстаўнік УЕФА прапанаваў пасярэдніцтва ў перамовах паміж ведамствамі.

А перад стартам чарговага чэмпіянату Кавальчук затрымаў новыя мячы для чэмпіянату Беларусі па футболе.