Як сям'я Лукашэнкі ловіць рыбу ў Расіі — расследаванне "Бюро"

06/02/2025 - 14:49

Як атачэнне Лукашэнкі ловіць рыбу ў Расіі

Як атачэнне Лукашэнкі ловіць рыбу ў Расіі / vestnikapk.ru

Беларускія ўлады ўжо больш за дваццаць гадоў атрымліваюць квоты на вылаў рыбы ў Расіі, зарабляючы на гэтым мільёны долараў. Да гэтага мае дачыненне муж унучкі Лукашэнкі. Пра гэта распавядаецца ў новым расследаванні "Бюро".

Еўрарадыё коратка пераказвае яго.

Зяць — няма чаго ўзяць?

Муж унучкі Лукашэнкі Дзмітрый Дзятлаў вучыўся на факультэце міжнародных адносін БДУ. Там жа вучылася і ўнучка Лукашэнкі — Вікторыя.

Пасля заканчэння ўніверсітэта Дзмітрый стаў намеснікам начальніка камерцыйнага аддзела кампаніі "ЗахадТрансЭкспедыцыя".

Кампаніяй сумесна валодае (25%) і кіруе бізнесвумен Людміла Няронская.

Дзякуючы Кіберпартызанам "Бюро" высветліла, што зяць Віктара Лукашэнкі працягвае рабіць кар'еру ў бізнес-структурах Няронскай. У 2022 годзе Дзятлаў пераходзіць з "ЗахадТрансЭкспедыцыі" ў яе новыя кампаніі: "Марскія промыслы" і "Марскія сезоны".

У абедзвюх фірмах ён заняў пасаду намесніка дырэктара па агульных пытаннях. І ўжо да сярэдзіны 2023 года Дзятлаў стаў зарабляць больш за 10 тысяч беларускіх рублёў на месяц.

Лавіся, рыбка…

"Марскія сезоны" з'явіліся ў кастрычніку 2022 года. Кампанія будуе рыбаперапрацоўчы завод у свабоднай эканамічнай зоне "Віцебск" і карыстаецца шырокімі падатковымі і мытнымі льготамі.

Інвестпраект Няронскай таксама ўключылі ў дзяржаўную праграму "Аграрны бізнес" і выдзелілі льготны крэдыт у 240 мільёнаў беларускіх рублёў на будаўніцтва завода.

Нядаўна кампанія абвясціла, што шукае работнікаў у Мінску, пакуль не адкрыецца завод у Віцебску. Рыбу мінтай для вырабу філе, фаршу і іншай прадукцыі будуць завозіць з Расіі.

Людміла Няронская валодае рыбалоўным бізнесам і ў Расіі. Ёй належыць палова кампаніі "Саюзныя рыбныя промыслы" — рэзідэнта свабоднага порта "Уладзівасток".

Яна можа на працягу пяці гадоў са дня заснавання не плаціць падатак на прыбытак з асноўнай дзейнасці. У 2023 годзе падаткам на прыбытак не абкладалася 73,7% ад даходу кампаніі. Дзмітрый Дзятлаў, муж унучкі Аляксандра Лукашэнкі, пазначаны членам савета дырэктараў "Саюзных рыбных промыслаў " у справаздачы за 2023 год.

"Саюзныя рыбныя промыслы" ловяць рыбу на ўласным судне "Парфірый Чанчыбадзэ", а таксама на арандаваных рыбалоўных судах. У 2023 годзе Беларусь упершыню атрымала квоту на вылаў 50 тысяч тон мінтая ў Берынгавым і Ахоцкім морах. Летась рыбную квоту павялічылі да 51 тысячы тон.

Акрамя "Саюзных рыбных промыслаў" рыбныя квоты ў Расіі асвойвае яшчэ адно сумеснае беларуска-расійскае прадпрыемства — "Саюзрыба", якая напалову належыць прадпрыемству "Санта Брэмар".

Сёлета, паводле інфармацыі "Бюро", яно зможа вылавіць амаль 9 тысяч тон шпрот, траскі, пікшы і селядца.

Прыбытковы гешэфт

Беларусь не мае выхаду да мора і дамовілася пра ловы рыбы ў расійскіх водах у 2002 годзе. Спярша квоты былі невялікімі. Паводле звестак расійскага выдання Forbes, з 2005 да 2019 года Беларусь на бязвыплатнай аснове атрымала права на вылаў 75 тысяч тон рыбы ў расійскіх морах.

Як піша "Бюро", Беларусь спраўна выбірала рыбныя квоты, перыядычна просячы іх павялічыць, і такі дамаглася свайго. Сёлета сумесныя прадпрыемствы змогуць вылавіць амаль 65 тысяч тон рыбы ў Балтыйскім, Баранцавым, Берынгавым і Ахоцкім морах.

85% выдзеленых квот прыйшлося на далёкаўсходні рэгіён, дзе ловіць рыбу кампанія "Саюзныя рыбныя промыслы", адной з уладальніц якой з'яўляецца Людміла Неронская.

Беларусы атрымалі права на вылаў 6 тысяч тон ціхаакіянскага селядца і 50 тысяч тон мінтая ў Ахоцкім і Берынгавым морах.