МЗКЦ трымаецца толькі на ваенных заказах з Расіі — BELPOL

Мінскі завод колавых цягачоў (МЗКЦ) цалкам інтэграваны ў расійскі ваенна-прамысловы комплекс, забяспечваючы тэхнічную падтрымку агрэсіі супраць Украіны. Пры гэтым заказчык — Расія — заніжае цэны на прадукцыю да 17%. Такія даныя прыводзіць BELPOL у трэцяй серыі “Зброевага барона”.

Завод стаў важнай рамонтнай базай для арміі Расіі. Спецыялісты МЗКЦ, а гэта сотні чалавек, з снежня 2023 года працуюць на расійскіх аб’ектах, аднаўляючы ЗРС С-400, С-300, тэхніку з "ЛНР". Яны абслугоўваюць зенітныя палкі ў Растоўскай вобласці, Крыме, на Луганшчыне, артылерыйскія злучэнні — сістэмы, што наносілі ўдары па ўкраінскіх гарадах.

47% прадукцыі МЗКЦ — гэта ваенныя шасі. Рамонтныя камплекты распрацаваныя пад САУ "Кааліцыя-СВ", мадэрнізаваныя пад "Панцыр-С". У 2024 годзе завод выпускаў па шэсць шасі на месяц: для Т-72/Т-80, "Каліна" (Т-90М), "Рамка" ("Тэрмінатар"), БТР-82А, ПТРК "Хрызантэма-С", "Дэрывацыя-ППА".

Пры гэтым фінансавае становішча прадпрыемства нельга назваць устойлівым, гаворыцца ў фільме BELPOL. Расія заніжае цэны на 17% ад сабекошту, выклікаючы спрэчкі і прыпыненні паставак.

Для выканання заказаў завод бярэ крэдыты. Толькі за пяць месяцаў 2024 года выплаты па працэнтах за крэдыты склалі 1,5 мільёна рублёў.