Кітай адыгрывае ключавую ролю ў стварэнні ўзбраенняў для Беларусі

15/11/2025 - 17:39

Як Беларусь уцягваецца ў вайсковую кааперацыю з Кітаем

Як Беларусь уцягваецца ў вайсковую кааперацыю з Кітаем / Коллаж BELPOL

Беларусь цесна супрацоўнічае з Кітаем і дзякуючы гэтаму падтрымлівае працаздольнасць уласнага абаронна-прамысловага комплексу, гаворыцца ў дакладзе BELPOL. Пасля ўвядзення маштабных санкцый супраць Беларусі рэжым Лукашэнкі пры дапамозе кітайскіх кампаній выратоўвае свае ключавыя вытворчасці, якія працуюць на ВПК.

У нашай краіне наладжаны выпуск оптыка-механічных прыцэлаў для расійскай бранятэхнікі і стралковай зброі. Беларусь выконвае ролю зборнай пляцоўкі: найбольш складаныя дэталі вырабляюцца ў Кітаі і пастаўляюцца праз фірму-пракладку Shenzhen 5G Hi-Tech Innovation, створаную беларускімі грамадзянамі спецыяльна для абыходу санкцый.

Кантракты з кітайскімі пастаўшчыкамі дасягаюць дзясяткаў мільёнаў юаняў, а самі кампаніі часта знаходзяцца пад санкцыямі.

Таксама ў дакладзе адзначаецца, што ў Беларусі створаныя вытворчасці боепрыпасаў поўнага цыклу. Паводле дакументаў, толькі за 2023–2024 гады ў Расію адпраўлена больш як 4,5 млн дэталяў для рэактыўных снарадаў “Град” на суму звыш 25 млрд расійскіх рублёў.

Кітайскія фірмы пастаўляюць для гэтых заводаў абсталяванне, камплектуючыя, прэс-формы, лініі для абсталявання баявых частак, а таксама хімічныя рэчывы — у тым ліку кампаненты, якія адносяцца да выбуховых рэчываў.

Асобныя прадпрыемствы — МЗП, “БАЗцьюб”, “МолЗПМ” — цалкам залежаць ад кітайскіх паставак станкоў і тэхналагічных ліній.

Холдынгі “Планар” і “Інтэграл”, што выпускаюць літэграфічнае абсталяванне і мікрачыпы, трымаюцца на плаву дзякуючы закупкам аптычнага шкла, прэцызійных станкоў, кантролераў, відэакамер і іншых кампанентаў праз кітайскія кампаніі і фірмы-пракладкі.

У дакладзе BELPOL адзначаецца, што пастаўкі шкла ідуць праз Shenzhen Yuxing Machinery Equipment, што дазваляе абыходзіць абмежаванні і працягваць выкананне расійскіх кантрактаў беларускімі прадпрыемствамі.

Кітайскія камплектуючыя выкарыстоўваюцца ў абсталяванні для новых ліній “Інтэграла”, які забяспечвае мікрачыпамі прадпрыемствы расійскага ВПК, уключаючы “Роскосмас”, “Ростэх” і “Алмаз-Антэй”.

Акрамя таго, Кітай штогод аказвае прамую дапамогу Міністэрству абароны Беларусі, напрыклад, падтрымку на 50 млн юаняў у 2023 годзе.

BELPOL перакананы, што без кітайскай падтрымкі Беларусь не змагла б падтрымліваць цяперашні ўзровень мілітарызацыі і выконваць расійскія абаронныя заказы. І Кітай стаў ключавым донарам тэхналогій, камплектуючых і абсталявання, што дазваляе рэжыму Лукашэнкі зарабляць на вайне Расіі супраць Украіны.