Варшаўская "Легія" звольніла галоўнага трэнера. Чакаць беларуса на мосціку?

Варшаўская "Легія" спыніла супрацоўніцтва з галоўным трэнерам клуба Гансалу Фейю, паведамляе прэс-служба каманды.

— Дзякуем Гансалу Фейю за некалькі месяцаў працы, гістарычны выхад у чвэрцьфінал Лігі канферэнцый УЕФА і перамогу ў 21-м у гісторыі клуба Кубку Польшчы. Мы цэнім уклад трэнера ў развіццё каманды і жадаем яму поспехаў у далейшай трэнерскай кар'еры.

Адначасова паведамляем пра спыненне супрацоўніцтва. Гонсалу Фейю не будзе ўзначальваць варшаўскую "Легію" ў наступным сезоне. У бліжэйшыя дні мы падзелімся далейшай інфармацыяй, — паведамілі ў клубе.

У апошнім туры Экстракласы на хатняй арэне пры аншлагу "Легія" не змагла перамагчы "Сталь", якая па выніках чэмпіянату апускаецца ў Першую лігу польскага футбола.

Пасля матча трэнер стаяў асобна ад каманды, якая ўшаноўвала гульцоў, што завяршылі кар'еру ў клубе, і дзякавала фанатам.

На матчы фанаты вывесілі вялікі банер насупраць VIP-ложы і трэнерскага мосціка, у якім выказаліся негатыўна пра дзейнасць кіраўнікоў "Легіі", заклікалі будаваць чэмпіёнскую каманду і спыніць "фінансаванне лайна".

Нагадаем, "Легія" завяршыла сезон на 5-м месцы ў польскай Экстраклясе і заваявала пуцёўку ў кваліфікацыю Лігі Еўропы дзякуючы перамозе ў Кубку Польшчы.

Раней паведамлялася, што клуб можа ўзначаліць беларус Аляксей Шпілеўскі.

За "Легію" выступае беларускі нападнік Ілля Шкурын.